Uyu mukinnyi ukina hagati asatira izamu ufite imyaka 18 y'amavuko, yari amaze kugaragara mu mikino 12 mu marushanwa yose muri uyu mwaka w’imikino, ariko Arsenal ikemeza ko gukina muri Ligue 1 yo mu Bufaransa bizamufasha kongera ubunararibonye ku rwego rwo hejuru.
Nwaneri yanditse amateka akiri muto cyane, ubwo yakiniraga Arsenal bwa mbere mu kwezi kwa Nzeri 2022 mu mukino bahuyemo na Brentford, aba umukinnyi muto kurusha abandi bose wigeze gukina Premier League, afite imyaka 15 n’iminsi 181 y'amavuko. Icyo gihe yahise aba umukinnyi muto wa Arsenal wigeze gukina mu irushanwa iryo ari ryo ryose.
Nyuma yo gukina imikino mike mu bihe byabanje, Nwaneri yaje kwigaragaza bikomeye mu mwaka ushize, aho yakinnye imikino 37 mu marushanwa yose, harimo 26 ya Premier League na 7 ya UEFA Champions League, bikagaragaza icyizere gikomeye yagiriwe n’abatoza.
Uyu mukinnyi wakuriye mu ishuri rya Hale End kuva afite imyaka 8 y'amavuko, yasinyiye Arsenal amasezerano ya mbere y’umwuga muri Werurwe 2024, anongera gusinya amasezerano maremare muri Kanama 2025. Yatsinze kandi igitego cye cya mbere muri Arsenal mu mukino wa Carabao Cup atsinda ibitego bibiri, mbere yo gutsinda igitego cye cya mbere muri Premier League.
Uretse gukina muri Arsenal, Nwaneri ni umukinnyi w’ikipe y’igihugu y’u Bwongereza y’abatarengeje imyaka 21 y'amavuko, akaba yarahagarariye igihugu cye mu byiciro byose by’abakiri bato guhera ku batarengeje imyaka 16 y'amavuko.
Arsenal yamwifurije amahirwe masa mu rugendo rwe rushya muri Marseille, inemeza ko izakomeza gukurikirana iterambere rye, mu gihe uyu mukinnyi agiye kwigaragaza muri imwe muri shampiyona zikomeye ku mugabane w’u Burayi.
Ethan Nwaneri yerekeje muri Marseille ku nguzanyo yo gukomeza kwiyubaka
Ethan Nwaneri yari amaze kugaragara mu mikino 12 mu marushanwa yose muri uyu mwaka w’imikino
Umwanditsi: NIYOMUKIZA Gratien
