Nubwo intego ye ya mbere ikiri ugusubiza Manchester City mu murongo mwiza w’imikino, Guardiola ari no gushora imari mu mishinga itandukanye igaragaza ko afite icyerekezo kirambye nyuma y’umwuga we wo gutoza ruhago.
Mu gihe amasezerano ye azageza mu 2027, haracyari urujijo ku hazaza he muri Manchester City. Gusa, bisa nk’aho Guardiola yamaze gutegura neza ibikorwa bye by’ubucuruzi.
Vuba aha, Guardiola yifatanyije n’uwahoze ari umukinnyi wa Barcelona Sergio Busquets, bombi baguze imigabane mu kigo cy’ishoramari mu mitungo icuruzwa (property investment trust).
Ikinyamakuru cyo muri Espagne, La Razon kivuga ko Guardiola na Busquets baguze buri umwe 14.21% by’imigabane mu kigo Alquiler Seguro Asset Market.
Ishoramari ryabo ryatwaye hafi miliyoni £2.2 (£2.5m) kuri buri wese. Ikigo Ventu Europe nacyo cyaguze 17%, mu gihe 52.62% zisigaye zifitwe na Alquiler Seguro iyobowe na Antonio Carroza.
Iki kigo kizobereye mu gucunga amazu yo gukodesha ahendutse, kikaba gifite agaciro k’isoko ka hafi miliyoni £6 (€7m). Biravugwa ko Guardiola yakoresheje ikigo cye 08022003 Limited muri iri shoramari. Nk’uko Vanitatis ibitangaza, iri shoramari ryemejwe muri Gicurasi 2025, ariko rirangira burundu mu kwezi gushize.
Si ubwa mbere Guardiola afatanyije n’abahoze ari abakinnyi be mu bucuruzi. Mu mwaka ushize, yashoye imari mu ivuriro Monarka Clinic afatanyije na Thiago Alcantara wahoze akinira Barcelona na Bayern Munich, ndetse na Jonathan Soriano, wahoze akinira Espanyol. Iryo vuriro riherereye i Barcelona ritanga serivisi z’ubuvuzi bugezweho zirimo ubuvuzi bwo gusubiza umubiri mu buzima (regenerative therapy), ubuvuzi bw’ubwonko, n’ubuvuzi bwihariye ku bakinnyi.
Guardiola yatangiye gukunda uyu mushinga nyuma yo kuvurwa na Dr Mireia Illueca, umwe mu bashinze Monarka Clinic, yafunguwe ku mugaragaro muri Kamena 2025. Gusa, mu gihe hari aho ashoramo imari, hari n’aho ibikorwa bye byahagaritswe.
Mu mpera za 2025, resitora ye yo muri Manchester yitwa Tast Catala yarafunzwe. Iyo resitora yari yarafunguwe mu 2018.
Pep Guardiola akomeje kugaragaza ko atari umutoza w’umupira w’amaguru gusa, ahubwo ari n’umushoramari uzi neza uko ategura ejo hazaza he.
Uyu mugabo w’imyaka 55 y'amavuko, watangiye izina rye nk’umukinnyi w’ikirangirire muri FC Barcelona, agakomeza umwuga we nk’umutoza. Mu 2008, yahawe gutoza Barcelona, ayifasha kwegukana ibikombe bitatu icyarimwe (treble) mu mwaka we wa mbere, anegukana ibikombe 12 bikomeye mu myaka ine yayimazemo.
Nyuma yo gutsindira byinshi muri Bayern Munich, Guardiola yageze muri Manchester City mu 2016, aho yahubatse ubutegetsi bukomeye mu mupira w’amaguru w’u Bwongereza. Muri iyo myaka, yatwaranye na Manchester City ibikombe bitandatu bya Premier League ndetse anayifasha kwegukana Champions League.
Uretse gutsinda mu mupira w’amaguru, Pep Guardiola ari no kwitegura ejo hazaza mu bucuruzi
Pep Guardiola yashoye imari mu mitungo icuruzwa, akagura imigabane ifite agaciro ka miliyoni £2.2.
Umwanditsi: NIYOMUKIZA Gratien
